Ionad an Bhlascaoid

I nDún Chaoin, an paróiste is faide siar i leithinis Chorca Dhuibhne, tá ionad oidhreachta agus músaem uathúil. Insíonn Ionad an Bhlascaoid scéal na mBlascaodaí agus an phobail bhig Ghaelaigh a bhí ina gcónaí ann go dtí lár an 20ú haois. Píosa iontach ailtireachta atá san Ionad féin.

Deineadh uasghrádú iomlán ar Ionad an Bhlascaoid in 2022. Tugann na taispeántaisí nua agus idirghníomhach ann athinsint fhíorshamhailteach ar scéal na mBlascaodaí, a n-oidhreacht shaibhir agus a litríocht uathúil. Is Pointe Fionnachtana Shlí an Atlantaigh Fhiáin é láthair an Ionaid agus is buaicphointe é d’aon chuairt ar leithinis Chorca Dhuibhne. Tá ardán féachana ar bharr aille ar shuíomh an Ionaid as a bhfuil radharcanna iontacha ar oileánra na mBlascaodaí agus ar chósta an Atlantaigh a bhfuil teacht ag cách orthu.

Bhí an saol deacair ar na Blascaodaí. Mhair na daoine ar iascaireacht agus feirmeoireacht agus bhí streachailt in aghaidh na n-eilimintí i gceist gach lá. Tréigeadh an Bhlascaod Mór i 1953 mar thoradh ar mheath an phobail de bhárr eisimirce agus brú na nua-aoise sa chéad leath den 20ú haois.

Tá lorg cultúrtha ollmhór fágtha ag daonra Bhlascaoid Mhóir. Dhein údair an oileáin taifead ar shaol a bpobal i sraith leabhar atá ina dtaifid shóisialta luachmhara agus ina gclasaicí de litríocht na Gaeilge. Tugann siad léargas ar shaol atá imithe atá ina acmhainn iontach don lá atá inniu ann.

Tabhair cuairt ar Ionad an Bhlascaoid chun cuntas a fháil ar oidhreacht iontach mhuintir an Bhlascaoid Mhóir agus chun dul i ngleic le croílár chultúr, teanga agus stair na hÉireann.