Tá ríméad ar Oifig na nOibreacha Poiblí (OPW), i gcomhpháirtíocht le Comhairle Cathrach Bhaile Átha Cliath, a fhógairt go mbeidh an Nollaig mhór mhaith ag an gCaisleán ar ais arís i mbliana. Agus é suite i gcroílár phríomhchathair na hÉireann, beidh Margadh draíochtach na Nollag ar siúl ón 28 Samhain go dtí an 18 Nollaig 2024, agus beidh an margadh ceardaíochta faoi dhíon ar siúl ón 6 – 8 Nollaig agus ón 13 – 15 Nollaig.

Beidh tailte stairiúla Chaisleán Bhaile Átha Cliath lán le hiontais an gheimhridh leis an gceiliúradh féiltiúil seo agus togha an tséasúir ann do chách.

I measc na n‑imeachtaí i mbliana beidh Margadh na Nollag amuigh faoin aer ar a mbeidh búitíceanna uathúla le raon leathan d’earraí féiltiúla. Beidh an t‑imeacht seo, nach bhfuil ticéad ag teastáil ina leith agus a bheidh saor in aisce, ar siúl gach lá ó 12:00 go dtí 21:00, agus beidh neart gníomhaíochtaí ann agus ceann de na sainchomharthaí tíre is mó le rá i mBaile Átha Cliath mar chúlra acu.

Féadfaidh na cuairteoirí siúl ar a suaimhneas tríd an gclós a bheidh maisithe go haoibhinn, áit a mbeidh maisiúcháin lámhdhéanta, bronntanais uathúla, agus earraí ceardaíochta séasúracha ar díol ag na stainníní margaidh traidisiúnta. Beidh pléisiúir shéasúracha á dtairiscint ag táirgeoirí bia ceardaí a chuirfeadh cúr le do bhéal, foirfe chun sult a bhaint as blasanna na féile.

Anuas ar na pléisiúir chócaireachta bhlasta a bheidh ar fáil, bain sult as an tsiamsaíocht inár n‑ollphuball ar stíl Spiegel a bheidh maisithe don fhéile agus déan iontas den mhainséar álainn Napóileach a bheidh ar taispeáint sa Séipéal Ríoga. Féadfaidh na cuairteoirí dul ag spaisteoireacht trí na hÁrasáin Stáit stairiúla a bheidh ar oscailt do gach cuairteoir i rith shéasúr na Nollag.

Tá an Nollaig ag an gCaisleán ina príomhghné den fheachtas ‘Geimhreadh i mBaile Átha Cliath’ ag Fáilte Éireann chun na gníomhaíochtaí iontacha a bheidh ar siúl ar fud Lár Chathair Bhaile Átha Cliath an geimhreadh seo a chur os comhair an phobail. In 2023, bhí díreach os cionn 216,000 duine i láthair le sult as an Nollaig ag an gCaisleán agus as an atmaisféar i gCathair fhéiltiúil Bhaile Átha Cliath.

Bí linn don Nollaig ag an gCaisleán – Agus níos mó ná 1,000 bliain de stair ag baint le Caisleán Bhaile Átha Cliath agus flúirse de bhia, ceardaíocht, ceol agus siamsaíocht fhéiltiúil ar fáil – beidh rud éigin ann a thaitneoidh le gach uile dhuine séasúr seo na Nollag.

*Tabhair faoi deara le do thoil nach mbeifear in ann dul isteach in Árasáin Stáit ó 4.00pm go 4.20pm ar an 28 Nollaig chun ligean do bhainistíocht tí riachtanach agus leithscéal a ghabháil as míchaoithiúlacht*

An Nollaig ag an gCaisleán 2024 CCanna

Eolas Tábhachtach – *Tá an t-imeacht faoi réir ceadúnais*

1. Dátaí: Beidh an Nollaig ag an gCaisleán 2024 ar siúl ón Déardaoin 28 Samhain go dtí Dé Céadaoin 18 Nollaig, an dá lá sin san áireamh.
2. Cead isteach: Cead isteach saor in aisce, imeacht gan ticéad. Seans go mbeidh scuainí ann ag amanna gnóthacha.
3. Amanna: Osclófar na doirse ag 12:00 gach lá agus dúnfar an margadh ag 21:00 gach oíche.
4. Bealach Isteach an Imeachta: Beidh cead isteach chuig Nollaig ag an gCaisleán 2024 trí gheata ar Shráid an Pháláis (os comhair 3Olympia Theatre), Baile Átha Cliath 2 agus beidh an bealach amach chuig Sráid an Chaisleáin, Baile Átha Cliath.
5. Beidh an cead isteach is déanaí chuig an Imeacht 30 nóiméad sula gcuirfear críoch leis.
6. Oiriúnacht Aoise: Gach aois (ní mór do thuismitheoir / do chaomhnóir a bheith in éineacht le páistí faoi 18). Cruthúnas aoise (seans go mbeadh gá le cárta aitheantais a bhfuil pictiúr air a thaispeáint chun alcól a cheannach).
7. Fad: an meánfhad a fhanann daoine ná 30–45 nóiméad.
8. Tabhair do d’aire: Is imeacht faoin aer é seo. Ba cheart gléasadh go cuí. Molaimid bróga ísle a chaitheamh mar gheall go bhfuil cuid den chlós clúdaithe le clocha duirlinge.
9. Madraí / Ainmhithe: Ní ceadaítear ainmhithe ag an imeacht, seachas madraí cuidithe (mar shampla madraí treoracha).
10. Inrochtaineacht: Tá an t-ionad inrochtana ag cathaoireacha rothaí. Tabhair do d’aire go bhfuil clocha duirlinge sa chlós.
11. Leithris ar an láthair: Tá Leithris na bhFear, na mBan agus do Chách lonnaithe sna hÁrasáin Stáit agus beidh siad ar oscailt i rith an imeachta.
12. Saoráidí friothála ar naíonáin: Lonnaithe sna hÁrasáin Stáit agus ar oscailt i rith an imeachta.
13. Saoráidí cothaithe ar an gcíoch: Beidh seomra ar an mbunurlár ar cúl na nÁrasán Stáit ar fáil i rith an imeachta. Cuir ceist ar bhall foirne an OPW, le do thoil.
14. Airgid Tirim/ Cárta Creidmheasa: Tabhair do d’aire nach bhfuil aon ATM ar an láthair. Tá an ATM is gaire ar Shráid an Dáma.
15. Bugaithe / Pramanna: Tá fáilte roimh bhugaithe agus pramanna i gCaisleán Bhaile Átha Cliath, ach ní cheadaítear sna hÁrasáin Stáit iad.
16. Ticéid: Ní gá le ticéad don Nollaig ag an gCaisleán 2024. Má bhíonn an t-ionad lomlán ag am ar bith iarrfar ar phátrúin dul i scuaine sa chlós íochtarach.
17. Lónadóireacht ar an láthair: Ní féidir bia ná alcól a thabhairt chuig an Imeacht. Beidh beár ceadúnaithe ann agus beidh roinnt ionad mearbhia ar fáil ar an láthair.
18. Earraí caillte: Má tá ceist agat faoi earraí caillte, cuir ríomhphost chuig info@artisanevents.ie
19. Conas a théim chuig an Nollaig ag an gCaisleán: Moltar an córas iompar poiblí a úsáid le dul go dtí an Nollaig ag an gCaisleán.
Bus: Stopann neart busbhealaí gar do Shráid an Dáma, Sráid an Tiarna Éadbhard agus Sráid Sheoirse, lena n-áirítear 9, 13, 15, 16, 27, 40, 49, 54a, 56a, 65, 68, 68a, 77a, 122, 123, 140, 150 agus 151 (pleanáil do thuras bus anseo).
Luas: Is iad Faiche Stiabhna nó Coláiste na Tríonóide (Líne Uaine) agus Jervis (Líne Dhearg) na stadanna Luas is cóngaraí – lean an nasc seo chun do thuras ar an tram a phleanáil.
20. Páirceáil: Níl aon pháirceáil ar an láthair. Tá carrchlóis phríobháideacha agus páirceáil ar an tsráid ar gá íoc aisti lonnaithe i lár na cathrach.
21. Téigh i dteagmháil le: Má tá ceist agat maidir leis an Nollaig ag an gCaisleán, cuir ríomhphost chuig info@artisanevents.ie