Séipéal agus Ardchros Chluain Catha

Tógadh Séipéal Chluain Catha ar sheansuíomh eaglasta de chuid Cholum Cille as Dún na nGall. Tá sé suite taobh istigh de theorainn reilige nua-aimseartha sa lá atá inniu ann. Tá Ardchros Chluain Catha suite ar na gaobhair.

Tógadh an séipéal, a bhíodh mar chuid de mhainistir a bhunaigh Naomh Buadán, sa 17ú céad. Bhaintí úsáid as anuas go dtí an bhliain 1827. Tá leac uaighe ann a chuir Magnus MacOrristin in airde. Is dócha gurbh Albanach é. Tá claíomh agus camán greanta uirthi. Tá an séipéal suite in aice le bóthar cois portaigh. Is dócha go dtéadh sé a fhad le Reilig Mheigiliteach na Ceathrún Móire i gContae Shligigh.

Is ann do dhá Ardchros cóngarach don séipéal. Tá ceann amháin díobh go hiomlán slán nach mór (rinneadh athchóiriú uirthi); tá an ceann eile ina luí den chuid is mó agus tá an ceann bainte di. Tá an chros atá ina seasamh chóir a bheith 4 mhéadar ar airde agus tá trí phainéal i gceist leis an taobh a bhfuil a aghaidh siar: tá patrúin atá fite fuaite ina chéile le sonrú ar na painéil uachtair agus íochtair. Maidir leis an bpainéal láir, tá íomhá de dhá ainmhí ar a nglúine agus, laistíos díobh, tá beirt fhíoracha dhaonna ina suí — tá sé molta ag daoine áirithe gurb iad Naomh Pól agus Naomh Antaine atá i gceist leis na fíoracha úd agus iad sa ghaineamhlach.

Tá ceithre phainéal ar an taobh a bhfuil a aghaidh soir: tá patrúin theibí ar an dá phainéal ag an mbun; tá dearadh atá fite fuaite ina chéile i gceist leis an tríú painéal; agus tá radharc i gceist leis an bpainéal uachtair — léiriú ar scéal na mbuilíní agus na n-iasc is dócha.

Gabh chuig Amharcóir Timpeallachta Stairiúla le tuilleadh eolais a fháil faoi Shéipéal agus Ardchros Chluain Catha

Cosaint dár Stair – Cliceáil anseo chun léamh faoin tábhacht atá leis na láithreán oidhreachta speisialta inár dtír a chosaint

Tá an séadchomhartha náisiúnta seo faoi chosaint de réir Achtanna na Séadchomharthaí Náisiúnta 1930 go 2014