Caisleán na Cathrach

Tá Caisleán na Cathrach ar cheann de na caisleáin is mó agus is fearr a bhfuil bail air in Éirinn. Seasann sé go maorga ar oileán creagach ar an tSiúir.

Tógadh an caisleán sa tríú haois déag agus bhí sé mar dhaingean ag craobh na Cathrach de theaghlach cumhachtach na mBuitléarach. Bhí an dearadh a bhí air chomh héifeachtach sin gur ceapadh nárbh fhéidir é a ghabháil, ach i ndeireadh na dála ghabh iarla Essex é in 1599 nuair a úsáideadh gunnaí móra ina choinne den chéad uair. Rinneadh léigear air faoi dhó ina dhiaidh sin le linn Chogaí na Comhdhála.

Nuair a tógadh é, bhí Caisleán na Cathrach chun cinn go mór maidir le dearadh caisleán cosanta agus tá mórán den déanmhas bunaidh ina sheasamh go fóill.

Faoi láthair, tugann taispeántas closamhairc den scoth tuiscint mhionsonraithe don chuairteoir ar stair fhada an chaisleáin. Tagann mórán cuairteoirí chuig an gcaisleán freisin mar gheall ar a ról mar shuíomh scannánaíochta agus teilifíse – bhí sé le feiceáil i léirithe amhail Excalibur agus The Tudors.