Caisleán Dheasumhan – An Caisleán Nua Thiar

Is in iarthar Luimnigh atá mórán de hallaí meánaoiseacha na hÉireann atá fós ina seasamh. Tá Halla Cóisire Dheasumhan sa Chaisleán Nua Thiar ar cheann de na cinn is suntasaí díobh.

Thosaigh Tomás ‘an tÁpa’ Mac Gearailt á thógáil sa tríú haois déag. Baisteadh an t-ainm sin air de bharr scéil gur thóg ápa as a chliabhán é go barr Chaisleán Thrá Lí – agus gur thug sé ar ais go slán sábháilte arís é.

Ach, tógadh an chuid is mó den fhoirgneamh maorga sa chúigiú haois déag, nuair a bhí iarlaí Dheasumhan in ard a réime, agus baineadh úsáid as mar ionad do mhórán féastaí móra.

Tá athchóiriú iomlán déanta ar an ngailearaí darach, áit a mbíodh ceol callánach á sheinm ag ceoltóirí don ragairne thíos fúthu.